Seachdain Ghàidhlig na Cruinne ─ bogadh Gàidhlig ga mhaoineachadh le SFC

Photo: City of Glasgow College, Royal Conservatoire of Scotland, University of Aberdeen, UHI Moray, University of the Highland and Islands.

Ann an Seachdain na Gàidhlig, bu toigh leinn meòrachadh air a’ bhuaidh a thug maoineachadh SFC air Gàidhlig, agus gu h-àraidh air Prògram Bogaidh na Gàidhlig aig Oilthigh Ghlaschu.

Aig ceann na bliadhna an-uiridh, fhuaras dearbhadh gun rachadh bliadhna bhogaidh phìleatach na Gàidhlig aig Oilthigh Ghlaschu a dhèanamh maireannach le gealltanas a thaobh taic-airgid san fhad-ùine bho Cholaiste nan Ealan is Daonnachd aig Oilthigh Ghlaschu.

An toiseach, chaidh Prògram Bogaidh na Gàidhlig a thairgsinn do dh’oileanaich mar phròiseact pìleatach le taic-airgid bho Chomhairle Maoineachaidh na h-Alba.

Shoirbhich leis a’ phrògram seo gu mòr oir tha na h-oileanaich aige air leantainn orra gu cosnadh ann am foghlam, stiùireadh, rianachd agus ealain chruthachail na Gàidhlig. Tha SFC rùnaichte air taic agus leasachadh a chumail ris a’ Ghàidhlig, agus mar mhòr-bhuidheann poblach nàiseanta ann an Alba, tha comas againn air tabhartas brìgheil a chur ri ionnsachadh is rannsachadh na Gàidhlig ann an colaistean is oilthighean na h-Alba.

Thuirt Gillebrìde MacIlleMhaoil, a tha na Àrd-òraidiche aig Roinn na Ceiltis is Gàidhlig agus na Phrìomh-Rannsaiche air ìre phìleatach Prògram Bogaidh na Gàidhlig:

“Is e ceum fìor chudromach a th’ ann am Prògram Bogaidh na Gàidhlig aig Oilthigh Ghlaschu airson lìbhrigeadh na Gàidhlig ann an Alba. Faodaidh oileanaich Ghlaschu a bhith ag ionnsachadh Gàidhlig le dòighean bogaidh a-nis. Tha an cùrsa a’ toirt chothroman airson ghreisean gnìomhachais aig buidhnean is sgoiltean Gàidhlig. ’S e rud prìseil a th’ ann gun do rinn an cùrsa ceanglaichean ri Ceòlas Uibhist agus gu bheil cothrom aig na h-oileanaich againn trì seachdainean a chur seachad ann an Uibhist air am bogadh sa Ghàidhlig mar phàirt de an cuid oideachaidh.

“Cha bhiodh am prògram seo air soirbheachadh mur b’ e an taic-airgid trì-bliadhna a thug Comhairle Maoineachaidh na h-Alba don ìre phìleatach aig toiseach gnothaich. Bho chionn goirid, dh’fhoillsich Colaiste nan Ealan is Daonnachd aig Oilthigh Ghlaschu gun deach taic-airgid a dhearbhadh airson Prògram Bogaidh na Gàidhlig san fhad-ùine, rud a tha a’ stèidheachadh a’ phrògraim mar phàirt dhaingeann den iomadh cuspair a th’ air a thabhann le Roinn na Ceiltis is Gàidhlig.”